Deklasaun Offisial

Dr. António da Conceicão

Deklarasaun Offisial  Kandidatu Prezidente da Repúlika Periodo 2017-2022

Ohin, loron rua, fulan rua, tinan 2017, Hau António da Conceição “Kalohan”, ofisialmente deklara hau nia kandidatura  nudar kandidatu ba prezidente da Republika periodu 2017-2022.

Hili data dia 2 hodi nafatin hanoin, data ida nebe, ita nia nasaun doben Timor-Leste, kalohan hafalun rai no hatada notisia mata-wen ba Timor-oan tomak: Presidente Partido Democrático e Ministru de Estadu Koordenador dos  assuntos sociais e Ministru da Edukasaun Fernando La  Sama de Araújo fila hikas ba mundo seluk no ohin kompleta fulan rua-nulu (20).

Ita hotu hakruk hakmatek minute ida, hanoin ita nia heroi sira :  Fernando La Sama de Araújo, Nicolau dos Reis Lobato, Francisco Xavier do Amaral, Nino Konis Santana no sira hotu nebe fo ona sira nia an, balun fakar sira ran hodi sosa ita nia independênsia. Ita hakmatek!

POVU TIMOR –LESTE

MAUN BOT SIRA FUNDADOR DA NASAUN RDTL

COMPANHEIRO PREZIDENTE PARTIDO DEMOCRÁTICO

COMPANHEIRO SEKRETARIU JERAL

COMPANHEiROS NO COMPANHEIRAS

VETErANUS E veterANAS

FILHOS Dos MARTIRES DA PATRIA

CAMARADAS

INAN FETO, NAN, AMAN NO MAUN ALIN SIRA HOTU

Hahu tinan 2012, ita nia líderes históriku deklara ba Nasaun prosesu foun atu halao tranzisaun ukun iha Nasaun Doben Timor-Leste. Maun bot Xanana, ita hotu nia mata Dalan iha tempu funu nomos iha tempu ita hari Nasaun no hari Estadu hamutuk ho líder históriku seluk hanesan Maun Ramos Horta, Maun Mari Alkatiri, Maun Prezidente Taur Matan Ruak, Eng. Mario Viegas Carrascalão, Lider Igreija Katolika nian, sira hahú hanoin no koalia ba malu, oinsa jerasaun foun hatutan prosesu ukun Nasaun Timor-Leste. Hanoin nee sira hotu tau dunik ba iha pratika.

Iha tinan 2015 Maun bot Xanana Gusmão nudar Primeiro Ministro ba V Governu Konstitusional ho fuan ho laran DESIDE husik nia knar nudar Primeiro Ministro no hili jerasaun foun ida atu hatutan nia obra ba Nasaun Timor-Leste Nune’e, ohin ita iha VI Governu marka ona prosesu tranzisaun liu hosi jerasaun foun ida Primeiro Ministro Dr. Rui Maria de Araújo.

Hau nia Deklarasaun nudar kandidatu ba prezidente da Repúblika periodu 2017-2022 mai ho espiritu no intensaun politika ida ne’e :

1. Hau hakarak atu hau nia kandidatura garante konfiansa ba líder histórikus hotu, ita nia aman Nasaun nian, katak hau no ita sei tane ás sira nia sakrifisiu luta no sei tane ás sira nia mehi, hodi nafatin hatutan misaun lulik ida ne’e no halo rai timor fatin dignu, fatin hakmatek no fatin próspero ba Timor oan hotu;

2. Hau nia kandidatura mai atu konfirma desizaun estratégika nebe ita nia aman fundadores Nasaun sira hanoin ona konaba tranzisaun ukun. Iha 2012 bainhira Fernando La Sama de Araújo kandidata ba Prezidente da Repúblika ita hateten ba povu tomak katak “ Lasama nia Kandidatura afirma jerasaun foun nia prontidaun atu simu estafeta ukun” no ohin, Hau deklara, hau nia kandidatura atu mai fo konfiansa ba jerasaun tuan no aman Nasaun nian katak hau no ita bele duni e tenki bele hatutan sira nia mehi no povu nia hakarak.

3. Hau nia kandidatura mai atu marka no konfirma existensia multi-partidária iha Timor-Leste hodi haklaken nafatin ba mundo katak demokrasia sei nafatin buras no metin iha Timor-Leste.

Nune, ohin, hamutuk ho imi tomak nebe hola parte iha serimónia lansamentu hau nia kandidatura ba Prezidente da Repúblika Periodu 2017-2022 hau deklara “ Ba O Timor, Hau Maubere Oan pronto Servi”

Hau sura povu nia matenek, hau sura partidos politikus seluk nia vontade diak atu tulun hau no hau mos sura Aman Hari’i Nasaun sira nia mahon.

Hamahan-An Nafatin ho Fernando de La Sama de Araújo, Nicolau dos Reis Lobato, Francisco Xavier do Amaral, Nino Konis Santana hau hasaran hau-An.