DR. ANTÓNIO DA CONCEIÇÃO “ KALOHAN”
“ PROSESU TRANFORMASAUN LIDERANSA LABELE SAI OFERTA EH PREZENTE HUSI BANDEZA”
Lia hirak ne’e hato’o husi Kandidatu Prezidente Republika Dr. António da Conceição “ Kalohan” bainhira halo nia diskursu iha aktividade lansamentu Knua Amigos Kalohan ne’e inisia husi joven sira ne’ebé halibur hamutuk hanoin hodi estabelese Knua ne’e.
Durante iha nia diskursu hahu hanoin fila fali nia prosesu servisu hamutuk iha durante luta ba libertasaun Pátria iha linha Klandestina hamutuk ho Maun Eteuku hodi organiza strategia ba prosesu Ukun-rasik an ninian, inklui hase’e nia Belun sira ne’ebé uluk servisu hamutuk iha organizasaun o-oin ne’ebé mos marka prezenta iha lansamentu ne’e.
Iha nia konviksaun katak nia sei manan iha primeira ronde tamba nia la duvida ho kwalidade jerasaun foun nian konta ho apoio ne’ebé fo husi entidades oi-oin iha Rai ida ne’e, inklui Amigos Kalohan sira ne’ebé nakonu ho espiritu voluntarizmu no espiritu foinsa’e sira ne’ebé maka’as tebes hodi apoio ba nia no nia hakarak kandidata-an atu halo reprezentasaun politika ida ba manifesta, ezistensia no afirmasaun Juventude nian iha tempu luta no sai defensor ba Juventude sira iha futuru liu husi servisu hamutuk ho Governu atu kria kreatividades hodi transforma Juventude iha Timor-Leste sai Joven sira ne’ebé respeita malu, dinamizador iha sira nia Sosiadade rasik.
Kandidatu Prezidente Republika ba periodu 2017-2022 ho Numeru kandidatu-8 ne’ebé hasai nia Maestradu iha Universidade Lancaster Inglatera ne’e hateten katak biar Timor-Leste Rai ida ki’ik maibe iha nia pensamentu rasik oinsa mak atu lori Timor-Leste ba iha Mundo Internasional atu kria amizade ho Povu iha Rai sira seluk, tamba ne’e nia hateten katak Politika Diplomasia buat ne’ebé importante no sai prioridade bainhira nia sai eleitu ba Prezidente da Republika Timor-Leste no presiza define no hametin nia Politika externa hodi promove diak liu tan Timor-Leste nune’e bele sai konhesidu liu iha Mundo.
Tuir aktivista no Oan kiak Tony Duarte ne’ebé mos hola parte iha lansamentu ne’e hateten katak nia konhese didiak Dr. António da Conceição kleur dezde Indonesia nia tempu to’o agora, nia komentariu katak “Kalohan iha potensia, iha esperensia no matanek atu sai Prezidente da Republika ne’ebé reprezenta Povu Timor-Leste tomak”.
Rohan husi aktividades ne’e Dr. António da Conceição “ Kalohan” hato’o nia sentimentu ksolok no agradese ba Joventude no Estudante Universitariu sira ne’ebé badinas, iha inisiativa kreativu tebes hodi hari’I Knua/Knu’uk ida ne’e hodi halibur ideias, aktividades ne’ebé liga ho nia kandidatura no servisu hamutuk ho entidades oi-oin hodi manan iha eleisaun Prezidensial.
Aktividade lansamentu Knua Amigos Kalohan ne’e realiza iha Balide (Ex PM) iha loron Domingo, 19 fulan Fevereiro tinan 2017 ne’ebé loke ba espasu ba Publiku atu vizita fatin refere hodi asesu informasaun kona ba Kandidatu Prezidente Republika Dr. António da Conceição “ Kalohan” nina perfil no vizaun Politika ba Estado no Nasaun Timor-Leste.
Partisipa iha lansamentu ne’e mai husi entidade oi-oin hanesan reprezentante Partidos Politiku sira, estudante Universitariu sira, foinsa’e no aktivista voluntariu sira inklui Veteranos no oan-kiak balun inklui Amo Flavento husi Igreza Balide ne’ebé halo mos bensaun ba Knua refere.
(* Reportazem @Delsio#AmigosKalohan)
0 komentar:
Posting Komentar